O le aoauli o le Aso Lulu 22 o Me na maua ai ni alii Samoa se toalua i le Countdown i Onehunga o laua aveesea mai ni pusa pia mai i totonu o lea faleoloa.
Ua faailoa mai e se tasi o tamalii o loo galue ai o se sikulaki, e faatolu ona osofaia e nei aualii Samoa le faleoloa ma aveese mai pusa pia, ona o lea inu i le paka o loo faafesagai ma le Countdown.
O le osofaiga muamua a nei aualii na o i le afiafi, o lona lua o le gaoi na toe usu atu lea i le taeao o le Aso Lulu, ae oo i le aoauli o le Aso Lulu lava lea ae toe vaai mai le sikulaki ua toe o atu foi.
Sa talanoa iai le sikulaki i le la mea o loo fai, ae lē ano iai le aualii, sa lē mafai foi ona tago iai le sikulaki e aveese mai meatotino o le faleoloa ona o aiaiga o le galuega o loo galulue ai aemaise o puipuiga o le latou saogalemu mai le galuega.
Sa lē mafai foi ona vili leoleo mo se fesoasoani ona e taunuu atu leoleo ua oese ma le faleoloa.
O le foi faatolu atu o nei taulelea Samoa ma toe aveese mai pusa pia mai le Countdown na pu’e ai loa e lea sikulaki le tamai video ma tuu i luga o upega tafailagi.
Ma na ta’ua e lea tamalii e na o le pau lea o le auala e tatau ona fai i le aualii ia e taofia ai nei gaioiga matagā ua fai i totonu o le faleoloa.
Na valaau iai le sikulaki e o e su’e ni galuega e ola lelei ai, ae tali mai le isi taulealea o lea e tele tupe a le Countdown ae o le isi taulealea matua ua vaovao mai i le sikulaki.
Ma o se tu ma se aga ua faailoa ai le ta’uvalea ma le tuu maualalo o Samoa i totonu o atunuu o loo iai.
Ua mata’itū nei e le aufaigaluega nei aualii i le taimi e toe afea ai le faleoloa i se isi la gaioiga.
