A o faasolo pea iloiloga ma sa’ili’iliga i le tele o aafiaga o i latou sa tauaveina le Matāgaluega o Leoleo a le atunuu, o lea ua oo mai nisi o faamatalaga e tusa ai ma se lipoti a le pulega o le Independent Police Conduct Authority na faamanino mai ai le telē o aga lē tautamālii ua faaalia ma faatino e i latou na faauluulu iai le auaunaga e pei ona faamanino mai ai, le āsia e le tama’ita’i sui komesina sa iai o Tania Kura, o le alii o loo molia o lē foi sa avea ma sui komesia a le auaunaga, ia Jevon McSkimming i lona umia ai o ni ata ma ni faamaumauga o loo atagia ai ni gaioiga faasolitulafono o loo aafia ai ni fanauiti, e aofia ai ni gaioiga ma faatinoga o faigaaiga fai faamalosi ma isi.
I lenei matāupu o lea na ioe McSkimming i ona moliaga i lenei matāupu.
Faamauina e le alii Komesina o Leoleo i le taimi nei ia Richard Chambers faato’ā ia iloa lava le āsia ai e Tania Kura o Jevon McSkimming ina ua faaalia atu ni popolega a nisi o sui o le auaunaga, ma o iinā na ia fesiligia ai loa Kura i le māfua’aga ua ia āsia ai fua lē ua aafia i le tulafono.
Manatu Chambers, o gaioiga a Kura, ua faaalia ai le lē fetuna’i o le mafaufau o lea tama’ita’i i lana faai’uga o le aga’i ai i le fale a lē ua molia, ma sa lē tatau lava ona aga’i fua i le fale a McSkimming ona o loo faasolo su’esu’ega a leoleo.
E faapea lipoti mai le RNZ e faate’ia Tania Kura i le ese ai o mafaufauga a le Komesina ma le auaunaga i lana āsia ai o Jevon McSkimming.
Māua foi i lipoti na iai foi se isi ta’ita’i leoleo sinia na āsia lē ua aafia i le tulafono, ma na i’u lava ina tuu iai se lapata’iga, ona e lē o ni ala o tulafono tau leoleo le aga’i ai e āsia se tagata o loo molia i matāupu.
Faaalia e Chambers, e leai se sootaga o le āsia ai e Tania Kura o McSkimming i le māfua’aga ua mālōlō litaea ai le tama’ita’i i se taimi mulimuli ane.
E le’i fia tali Tania i ni fesili na tuuina atu e sui o le RNZ, ae na o lona fai ane e aga’i e sa’ili poo ua iai nisi ua faia ni gaioiga faapei ona ia faia.
Puna o Faamatalaga: https://www.rnz.co.nz/news/national/579265/former-deputy-police-commissioner-tania-kura-visited-jevon-mcskimming-after-charges-laid
