Ua maua lelei i meapueata a le CCTV le taimi o loo feta’ua’ina na soso’a ai e se taavale gaoia le faletalavai ma se bottle shop i Kuiniselani.
I se lipoti aupito lata mai o faalavelave faapea ua osofaia ai faleoloa ma pisinisi e faaaoga ai taavale e faaleagaina ai.
Fai mai leoleo o se taavale na faaaoga e osofaia ai le AFS Pharmacy i Dean St i Rockhampton i le vaveao ananafi.
E leai se mea na gaoia ae na toe sola ese le taavale mai lea nofoaga, ae fai mai le pule o le faletalavai e faitau afe le pili o le a ia totogi i mea ua faaleagaina.
E faafetaia e le alii pule gaioiga a lana aufaigaluega i le taimi o le osofaiga lea.
O le faamatalaga a leoleo 20 minute talu ona mae’a lea faalavelave ae lipotia ane foi se isi taavale gaoia o le ituaiga o le Holden Acadia ua soso’a foi luma o se tasi o faleoloa o le bottle shop i Farm Street e le mamao ese ma le faletalavai.
E manatu leoleo e iai le sootaga o faalavelave uma ia e lua ma o loo faia pea suesuega.
