O le usuia mai i lo tatou atunuu i lenei vaiaso o le fono a atunuu Aferika, Kerepeane ma le Pasefika ua faailoa ai e le tamaitai komesina o loo faauluulu iai le ofisa o le iuni a Europa i le Pasefika, le faamautu o le fesoasoani tupe e tusa ma le 8 tesimale 8 miliona tala poo le 3 miliona Euro tupe Europa.
O lea fesoasoani o le a faatupe ai galuega mo le faaleleia o le suavai taumafa, faapea le tulaga i le teuina lelei o vai lafoai.
O se fesoasoani na avea ai le Tamaitai Palemia o Samoa ma sui o le tatou Malo e taliaina lea agalelei o le iuni a Europa, a o faagasolo le fono a Minisita o malo Aferika, Kerepeane ma le Pasefika o loo faipaaga ma le iuni a Europa.
O Tesema o le tausaga na tea nei 2022 na faamautu ai se isi fesoasoani a le iuni mo Samoa e tusa ma le 38 miliona tala e tauala atu i fuafuaga a lo tatou Malo i lana fuafuaga tau tupe faaletausaga e fesoasoani ai e faatupe galuega e fesootai ma polokalame o suiga o le tau.
