E 36 tausaga o se tama’ita’i na taofia e leoleo ma molia i lona ave taavale onā, pe faatoluina le maualuga ua iai nai lo o le numera faatulagaina – legal alcohol limit.
Na maua e leoleo lea tama’ita’i i le uma ai ona momoli o lana fanau i le a’oga.
I se pepa o faamatalaga mai le New Zealand Police, na faamaonia mai ai pe o le itula e 10 i le taeao i luga o le State Highway 3 na maua ai lea tama’ita’i.
Ta’ua e sui o le auaunaga na maua o ia, e faapea sa aga’i atu Detectives Karin Wakefield ma Piet De Vegt i la taavale savili a leoleo (unmarked police car) ma o lea na faailoa atu e se isi avetaavale na i o luma, e iai se taavale o loo i pito i luma e lē o sa’o le alu i le auala poo lane e alu ai ma e fai lava sina lē saogalemu.
Ma o iinā sa iloa atu ai loa e leoleo foliga vaaia o le tulga o loo iai lē ua molia ma lona tauaveina o le taavale.
Na faatū e leoleo le taavale, sa fai iloiloga ma o iinā sa maua ai loa le tulaga onā ua iai lea tama’ita’i e 36 tausaga le matua.
Na pu’e faapagota ai loa o ia ma o lea na tula’i i luma o le Faamasinoga Faaitumalo i Whanganui.
Faailo foi le tuuina atu o faamaumauga a leoleo ina ua maua e lea 36 tausaga le fesoasoani tau i le taumafa ‘ava.
Faamanino e Sergeant Colin Wright e lē gata ina aafia le tagata o loo tauaveina le taavale pe a tagofia le ‘ava ae e tele foi aafiaga e fetaia’i ma tagata uma o loo i luga o le auala.
