Ua mafai foi ona taofia e leoleo le oo atu o se sapalai tele o le fualaau faasāina o le aisa i ona magaala ina ua o latou aveina le tusa ma le 6 tane o le fualaau faasāina sa nanā mai totonu o fagu ga’o Canolla sa aveina ane i Melepone.
Fai mai le ABC o fualaau faasāina sa nanā mai totonu o fagu ia sa fuafua mo Melepone ae aumai mai Kanata peitai ua maua uma.
Na faailoa e leoleo o fualaau faasāina ia o le aisa lea ua faaliusuavai ma aumai ai i fagu ga’o ia ma e oo i le 19 miliona se tupe e ono maua ai pe ana faatauina.
O se tasi lenei o uta tele ua maua i suesuega a leoleo sa galulue faatasi ai ma leoleo mai isi atunuu.
E toaono na pueina mai Melepone ananafi ina ua faia osofaiga a leoleo.
O se alii e 38 tausaga mai Melepone lava lea o loo feta’ua’ina o ia lea e iai ona sootaga ma se kulupu o le au solitulafono faapea i Kanata ma o loo feagai nei le alii lea ma le isi vaega lea na pueina faatasi uma ma moliaga e tusa o lenei mataupu, ma o faasalaga pe a faamaonia e ono oo atu i le nofosala i le falepuipui mo le olaga atoa.
