O lea ua maua i sailiga a leoleo le taulealea o To’ese Tu’uaga o loo masalomia i se gaioiga solitulafono na ia faapāpā ai se laau malosi i se vaega o le alatele i Vailoa Faleata i le vaiaso na te’a nei.
O loo masalomia foi e leoleo lea taulealea i le gaioiga i Sinamoga i ni vaiaso e lei mamao atu, lea na faapā atu ai mai se taavale le laau malosi ma faamanu’alia ai se alii talavou.
Ua faailoa e leoleo o le latou sailiga ua maua ai To’ese Tu’uaga, na maua ai foi ni taulelea se toalima o loo taofia i le vaaiga a leoleo ona o solitulafono e fesootai i fualaau faasāina.
I le toalima lea e toatasi ua tatala i tua i aiaiga ma o le a tulai i le faamasinoga faatasi ai ma isi alii e toafā i le aso 27 o le masina lenei o Me.
Mo le alii o To’ese Tu’uaga sa tau sailia o le aso 28 o Me ua faatulaga e tulai ai i le Faamasinoga Maualuga.
Ua faafetai leoleo i le atunuu i le lagolago atu, mo se Samoa saogalemu e pei ona taofia ai nei ia tagata i moliaga solitulafono ua tuua’ia ai.
