Ua maua e leoleo le taavale lea na aofia i le faalavelave na fanaina ai le teine talavou i le Aso Lua o le vaiaso nei.
O le asō ua faailoa mai ai lea faamatalaga e leoleo ma o le taavale o le ituaiga o le Mazda Axela 2009 na maua atu i Kelvyn Grove i Manurewa i le po anapo.
Fai mai lipoti a le Stuff ina ua o latou fesiligia le tagata e ana le tuatusi lea na maua iai le taavale sa ia faailoa ane e lē nofo ai i le tuatusi lea le tagata e ana le taavale ae e latou te iloa foi lea tagata ae lei toe faailoaina ane nisi faamatalaga.
O molimau foi a nisi o tuaoi i lea nofoaga ua ta’ua ai na poloka uma e leoleo pito e lua e ulufale ai i le auala lea ma sa leo e leoleo faaaupegaina a o faagasolo le sueina o le fale.
Ua tea i tua ma le falemai le teine talavou na aafia i le faalavelave ae lei iai lava se tasi ua molia i lenei mataupu.
Saunoa se sui o leoleo o loo iai tagata i le komiuniti o loo iloa tagata sa iai i le taavale lea i le po o le Aso Lua ma ua oo i le taimi ua tatau ai ona fai le mea sa’o ma logo atu leoleo i ia faamatalaga.
