Ua nofo taofia nei i le vaaiga a leoleo i le falepuipui i Tanumalala se alii talavou 18 tausaga ona o loo masalomia, o ia lea faatasi ai ma se isi alii talavou e lei maua, na osofaia se pisinisi o se faleoloa i Moamoa fou i le aoteatea, ma la aveesea ai le masini e tuu ai tupe o lea pisinisi.
O le ata na pueina e meapueata o le faleoloa, o loo vaaia ai ni alii talavou se toalua o loo pupuni o la foliga, sa tamomoe faanatinati i totonu o le faleoloa a o la umia se agaese, ma aveese le masini tuu tupe.
O le tamaitai faatauoloa na ia faafuasei ona vaaia lea gaioiga ma momo’e ese faavave ma avanoa ai le gaioiga na gaoia ai le masini tuu tupe.
E lata i le luaafe tala le seleni sa iai i le masini.
O le Aso Lulu o le vaiaso na tea nei na tulai mai ai lea gaioiga solitulafono.
