E fā faleoloa na maua o loo faatauina faasolitulafono le ava malosi i tupulaga talavou.
O tupulaga talavou nei e lei ausia tausaga e mafai ai ona faatauina atu iai ava malosi ma o le lua na maua i Whangarei ma le isi lua i Bay of Islands.
O suesuega faalilolilo nei na faia e le gata i leoleo ae faapea sui o le soifua maloloina faatasi ai ma le fesoasoani a nisi o volunteers tai 16 tausaga le matutua.
O faleoloa e lua o Whangarei na maua mai le 19 faleoloa na taulai iai suesuega, ae o le 2 mai Bay of Islands e mai le 20 faleoloa.
Ua faaalia ai e leoleo le faanoanoa ma e le tatau ona tupu ma e ono seia ai laisene mo sina taimi ona ua le faamalieina taiala o laisene.
Ua toe faamanatu ai le sui o le ofisa e tatau i faleoloa o loo faatauina atu le ava malosi ona tapa le ID o soo se tasi e foliga e i lalo o le 25 tausaga.
E le fou sailiiliga a leoleo nei e faia e iloa ai poo faamaoni pisinisi i le siakiina o tausaga o tagata o loo faatau atu iai le ava malosi.
