E toeitiiti 750 kilo o le fualaau faasāina o le aisa lea ua faamaonia mai nei na maua e le vaega a le Border Force a Ausetalia ma ta’ua sa nanā mai i containers na aumai i se vaa i Sini.

Faapea se lipoti mai le 7News o le container na aumai ai le uta o tiles na aumai ai ma ia fualaau faasāina e feta’uaina e foliga o se kulupu solitulafono faavaomalo (international crime syndicate) o loo i tua o lea gaioiga.

Ta’ua o le masina na te’a nei i le faai’uga na maua ai e le Border Force le sapalai tele lea ma logoina ai loa leoleo. O loo ta’ua o le vaa sa taula i le uafu i Port Botany ae na sau mai le United Arab Emirates. E to’atolu la alii ua pu’e e leoleo i le vaiaso nei ma afai e faamaonia moliaga o lona uiga o le a soloatoa i le falepuipui.

O le tau aofai o lea uta e silia ma le $675 miliona ma ua faailoa e leoleo o le uta aupito tele lea ua maua e leoleo i se su’esu’ega na galulue faatasi ai ma isi vaega su’esu’e.