O le afio’aga o Manase i le itumalo o Gagaifomauga Numera Muamua i le motu o Savaii sa i le polokalame o vai tuma’oti, peitai o le talia ai e le malo o le talosaga a le sui Faipule ina ia faaulufale Manase i le auaunaga o le suavai o loo pulea e le malo, ua talia ma amata ai loa ona faatino le galuega o le ta’i mai o ofe paipa mai le faatanoavai i Safotu.
O se galuega ua umusa ma tatala, ina ua soo uma aiga o le nuu i le suavai mamā ma saogalemu mo lo latou soifua mālōlōina.
O le galuega e silia i le 233 afe tālā sa faatupe i se fesoasoani a le Iuni a Europa e tauala i le faiga paaga ma le Pulega o le Suavai le Samoa Water Authority.
Le Minisita o Galuega Tetele ma Felauaiga e iai ma le pulega o suavai le tofa Olo Afoa Fiti Vaai, i le tatalaina o le galuega o le suavai taumafa mo le afio’aga o Manase i le itumalo o Gagaifomauga Numera Muamua.
