E iai faamaumauga ua maua e le 9News ua iloa ai e 88 itula na faatali ai gasegase i le emergency department o se falema’i i Sini aemaise o tulaga lē saogalemu sa feagai ma ona tagata faigaluega.
O loo lipotia e le Alaata 9 o faamaumauga ua liki mai le falema’i i Westmead ua iloa ai o se tagata e aafia i gasegase o le mafaufau na faatali mo le 88 itula mo se togafiti atoa ai ma isi gasegase sa iai lamatiaga tau le mafaufau ma le pule i le soifua na umi foi se taimi sa faatali ai mo togafitiga.
Fai mai le lipoti o loo tuua’ia le faigamalo a Niu Sa Uelese i lea tulaga ma e umi se taimi sa talanoaina ai, o le faamatalaga lea mai le tausi soifua e feagai ma gasegase ia o Nick Howson.
O loo ta’ua i le lipoti na taumafai se tasi gasegase e osofa’i se foma’i i se naifi tulou i le mae’a o se taimi umi na faatali ai mo se togafiti i le falema’i lava lea o Westmead, e leai se tasi na aafia ai i lea mataupu ae o le faamatalaga a le aufaigaluega o loo lipotia ua fefefe e faamatala ia tulaga ma e le’i tuuina ane foi sa latou faatanaga i le 9News e faailoa ai ata sa pu’eina i le taimi lea se’ia oo mai i le asō.
Ua faailoa e le ofisa o le Minisita o le Soifua Mālōlōina o loo ave le faamuamua i le mataupu lea i le taimi nei ae faailoa foi i nisi lipoti e to’atele foma’i o le mafaufau ua aga’i ese ma galuega ae le’i iai lava se gaioiga ua faia i lea tulaga.
