O le itu i Sisifo o Sini lea ua lipotia mai ai i le asō le maua o se tinomaliu o se tamaitai i se fale i lea faaitu i le ‘afa o le lua i le aoauli ananafi.
O le taimi nei o loo feagai leoleo ma le suesuega o lenei faalavelave sa valaau ane ai le latou fesoasoani i Borrowdale Way i Cranebrook, fai mai na maua atu iai lē ua maliu e tigaina ona manuaga ma e 31 tausaga le matua. Na maliu ai lava i lea nofoaga.
Fai mai leoleo e talitonu o lē ua maliu e le nofo ai i le fale lea ae masani ma tagata o loo nonofo ai.
Ua faailoa foi e le Channel 7 molimau a nisi fai mai na vaaia se tagata o momo’e ese mai ma lea fale ma o i le isi vaega o loo agai iai suesuega a leoleo.
