Ua matuā saoasaoa le alumia o le faatauina o EVs poo taavale e ola i le eletise i le taimi nei, e pei ona ta’ua e nisi kamupani faatau taavale i le 1News, ua tele ina taulia lava taavale a o iai pea i luga o vaa e le’i taunuu mai i laufanua o Niu Sila.
O le tulaga lena ua iai le naunau o tagata i le taimi nei e maua ni taavale eletise talu mai ona matuā oso maualuga le tau o le penisini ua iai nei.
O faamaumauga pito lata mai a le Matagaluega o Fela’ua’iga ua faamaonia ai lea tulaga maualuga ua iai le aofa’i o taavale eletise ua faatauina.
O taavale eletise fou faato’ā taunuu i totonu o Niu Sila ma taavale eletise fou ua leva ona iai i Niu Sila ae o lea faato’ā lesitala, ua oo i le 1,033 i le vaiaso lea na faai’u i le aso 22 o Mati, o se aofa’iga matuā tele lava pe a faatusa atu i le vaiaso faapena i le tausaga talu ai.
O nisi tagata e le’i iai muamua se fuafuaga e faatau se taavale eletise, ae o suiga ua iai nei le tau o le suāuu ma le penisini, ua faafuase’i ai lava ona toe suia mafaufau.
Ta’ua e i latou o loo faatauina atu taavale, ua taulia uma taavale EV sa faatutū i totonu o fale e faalauiloa ai poo showroom floor, ma taavale ua uma ona totogi ma taulia a o lea e le’i oo mai le vaa o loo aumai ai le uta o na taavale.
O le lipoti lava lea e tasi ma isi uma foi kamupani faatau taavale, i le telē o le mana’oga ua iai nei mo taavale eletise, ua matuā maoa’e mamao atu nai lo le tulaga sa masani ai.
Ae lē nao kamupani faatau taavale ua tofo i lea suiga vave, e faapena foi i faletupe.
Ta’ua e se sui o le Westpac, i le lua vaiaso talu ai, ae ua faaluaina le tele o nonōgatupe ua fai mo le faatauina o taavale eletise.
Ta’ua foi e le BNZ ua oso maualuga foi le to’atele o a latou paaga ua fai nonogātupe, e pei o le “Better Future” home loan top-up, ua oo atu i le 66% le maualuga pe a faatusa i le masina ua te’a.
Ma tusa o le ‘afa o na top-ups i le taimi lenei o loo fai mo le faatauina o ni taavale eletise ma taavale e mafai ona ola i le eletise toe ola i le penisini.
Ua faatusa e nisi le suiga faafuase’i ua iai nei, ua pei lava ua toe oo i le vaitaimi o le koviti.
Mo i latou e lē o mafai ona faatau ni taavale eletise i lenei taimi, o lea aga’i nisi tagata e faaaogā isi auala e tausavali ai i galuega, e aofia ai le faaaogā o uilavilivae, lea foi ua ta’ua e nisi faleoloa le oso foi i luga o le mana’oga mo uilavilivae.
E ui o nisi na amata ona aga’i e faaaogā uilavilivae ona o le fiu i le poloka i luga o le auala i le tele o taavale, ae ua atili faamausalī nei lea fuafuaga ina ua iai aafiaga i le siita’i o tau o le penisini.
O le isi la lea itu lelei o nei suiga, ua vave ona oso ai luga le tupe sefe poo le savings, ina ua lē toe tele se tupe e faatau ai le penisini o le taavale, ae ua vili le uilavilivae.
Puna o Faamatalaga: https://www.1news.co.nz/2026/03/26/evs-selling-off-the-boat-before-they-even-arrive-in-nz/
