E tele aoaoga lelei ma tāua o loo aoao manogi ai le Fofoga Fetalai o le Palemene le susuga Papalii Li’o Oloipola Ta’eu Masipa’u ma nisi o sui faipule o le fono aoao faitulafono, i fono faapalemene a le setete o Niu Sa Uelese i le atunuu o Ausetalia.

O se tasi o taualumaga tāua o loo faapena ona mataitu e le Fofoga o le Fono ma lana aumalaga, o le taimi e faagasolo ai fesili ma tali i totonu o taualumaga faapalemene auā o se tasi lea o vaega o taualumaga a le tatou Palemene ua toe faatino, e ui e lei faatinoina i taualumaga talu ai nei, ona e leai ni fesili a faipule na tuuina atu i le failautusi o le fono aoao faitulafono.

O le aumalaga a le Fofoga Fetalai ua aofia ai le sui faipule o Palauli Numera 3, le faipule o Faleata Numera 1 ma le faipule o Aana Alofi Numera 2.

Ua aofia ai foi le failautusi o le ofisa o le fono aoao faitulafono ma se alii ofisa sinia.

O le faigamalaga foi lea ua maua ai le avanoa e molimauina ai le faagasologa o taualumaga a komiti faapalemene ma mataupu mo le tapueina o tomai ma agavaa e fesoasoani ai i le faatinoga o galuega tau komiti faapalemene i le fono aoao faitulafono a Samoa.

O le vaiaso nei o loo auai le Fofoga Fetalai ma lana aumalaga i lea faatasiga.