Na lipotia i le aso ananafi le mata’itū lelei ma le toto’a e leoleo nisi o nofoaga e taatele ai kegi i Aukilani i Saute a o faagasolo toe sauniga o le sui o le Mongrel Mob o Daniel Eliu lea sa fana e le tagata i fafo ane o le nofoaga o le Ekalesia Aso Fitu i Puhinui i se taimi e lei mamao atu.
Fai mai le NZ Herald sa faalogoina le ūū leotetele o uilaafi i le motorway ma luga o le alatele a o agai ane le solo o le maliu.
O le faamatalaga a leoleo o ni uiga e le faatagaina faaletulafono o le a suesueina ma faia iai gaioiga talafeagai ma afai o lagona e nisi o le atunuu femalagaa’i se tulaga le saogalemu ona o nei sauniga e mafai ona valaau i le 111.
Ua faailoa i le lipoti i le aso ananafi e lei iai lava se tasi ua molia i lenei mataupu talu mai le aso 17 o Tesema.
