Ua galulue faatasi nei le Matāgaluega o leoleo, falepuipui ma le toefuata’ina ma isi auaunaga faaleoleo i atunuu tuaoi e aofia ai Niu Sila ma Ausetalia, i le mata’itūina o le feavea’iina o oloa tau vailaau e faaaogā i galuega e pei o le faamamāina o fale, ona o se tasi o vailaau o loo faaaogā ai e mafai ona avea ma nakoti poo se fualaau faasāina e tagofia e tagata ma oo ai ni lagona i ni amio e faatupu ai soligatulafono.
Ua faailoa e leoleo a le malo o Ausetalia o lea vailaau o loo iloa i le igoa o le Butanediol poo le 1,4-BD. lea ua faatupula’ia le faaulufale atu i lea atunuu.
E ogaoga ni amioga tau solitulafono e faatino e se tagata na te faaaogāina lea vailaau o se nakoti e pei ona faailoa e leoleo o lea malo i se faasalalauga faalaua’itele, ma e mafai e se vaega itiiti o lea vailaau pe a sui ai se meainu ona liua lagona o se tagata i ni amio lē manuia.
Ua faaalia e le matāgaluega o leoleo i Samoa o loo latou mata’itū le ono ulufale mai i le atunuu o lea ituaiga o vailaau i le naunauta’iga ia malu le puipuiga o Samoa mai gaioiga e faatupu ai soligatulafono poo organized crimes.
