Fai mai ua matua’i mata’itū ma le toto’a e leoleo a Ausetalia faatasiga ma solo tetee ua fuafua e nisi o faalapotopotoga ma tagata i le asō, e atoa iai le tausaga o le osofa’iga a le Hamas ia Isaraelu.

O le asō i le tausaga talu ai na osofa’ia ai e fitafita a le Hamas tuaoi ma Isaraelu ma fasiotia ai le silia i le 1,200 o tagata Isaraelu ma le 240 na ave faapagota.

O le osofa’iga lea ua afua ai le tali ane a Isaraelu lea e oo mai i le asō o loo faaauau pea ma ua silia ma le 40 afe tagata ua maliliu ai.

O le Jewish Community i Sini ua lipotia na aga’i ane i Bondi Beach i le taeao analeila ma faia ai se sauniga e faamanatu ai le atoaga o le tausaga o lea osofa’iga ae ua fuafua se faatasiga a tagata e lagolago ia Palesitina i le afiafi a nanei i le ta o le 6 i le Town Hall.

Na faailoa e le Palemia o Ausetalia, Anthony Albanese i sana faamatalaga i le asō, o se aso e manatua ai tiga matuiā ma e matua’i lē taliaina e Ausetalia gaioiga a le Hamas.

Fai mai le Palemia e leai se avanoa o ni uiga faailogalanu i soo se tagata o soo se faatuatuaga i totonu o Ausetalia.

Puna o Faamatalaga: https://www.9news.com.au/national/october-7-anniversary-hamas-attack-israel-protests-vigils-expected/90f7ce21-2e8e-473a-818f-7ba95f9a8092