Ua folafola e le Faigamalo a Niu Sa Uelese o loo latou mata’ituina nei le faia faasolitulafono o meafaapāpā i le Australia Day poo le aso malolo lea e faamanatu a taeao.
Ua faia lea tulaga ona o le alia’e o mea faapāpā sa faia i le mae’a o le afiafi o le New Year Eve na sei mavae atu nei sa lipotia ai e faatino o mea faapāpā a nisi e aunoa ma se laisene e faataga ai lea tulaga.
O lea la ua faailoa e le malo o soo se tasi e maua o faatino lea tulaga a o lumanai ai le aso malolo o le a iai se faatatau e faia iai.
Fai mai le sui o le Safework NSW, Natasha Mann o le agai o a latou sailiga i le faaaogaina o mea faapāpā nei i le setete, o loo ave iai le latou faamuamua.
O mea faapāpā e ono afaina ai soifua pe maliu ai foi se tasi pe a ogaoga aafiaga ma o se tasi lea o mafuaaga ua alai ona agai iai le silasila a le malo.
E soo se tasi foi e maua o faatau pe teuina ma feaveai mea faapāpā e aunoa ma se faatagana e ono faasala i se sala tupe e 27,500 poo le tuli o le 12 masina i le falepuipui.
