Ua fautuaina nei e le kulupu o loo mataituina le tau o pasese i vaalele mo faigamalaga i totonu lava o Ausetalia, kamupani vaalele ma faailoa iai i masina o loo agai mai o le a mata’itu ai tau o a latou auaunaga aemaise ua iai se lipoti fou ua aliae mai ua iloa ai ua matuai sili atu le taugata ua iai nei pasese i vaalele nai lo le taimi a o lei oo mai le faamai.
O le lipoti faatoa faamatuu mai a le ACCC lea latou te mata’ituina mataupu faapea ua iloa ai e 27 pasene ua maualuga ai le siitaga o pasese na amata mai ia Oketopa o le tausaga nei pe a faatusa ia Oketopa o le 2019.
O le Qantas, Virgin Australia ma le Rex ua toe faaitiitia uma le aofai o a latou faigamlaga ma o le isi mafuaaga lea ua ta’ua ua agai ai i luga le tau o pasese. I le lipoti i pasese eseese sa ofoina e kamupani vaalele ua iloa ai o economy fares lea ua aupito sili ona maualuga ai siitaga aemaise o le laititi o le aofai o faigamalaga ae tele le manaoga mai tagata e fia malaga.
Ua ta’ua foi i le lipoti o loo fuafua uma kamupani vaalele nei e tolu e maua ni polofiti tetele i le tausaga faaletupe lea e faamae’a ia Iuni o le tausaga fou.
