Ua maitauina le maoa’e ma le mata’ina o taumafaiga a le ‘aulakapi a a’oga, le Kelston Boys’ High ma le Westlake Boys’ High i le amatalia ai o le taamilosaga faavaomalo o le lakapi a a’oga o loo faatautaia nei i le atunuu o Abu Dhabi.
I lipoti mai le NZ Herald na faailoa ai le maualuga o le taumafaiga a le aoga a Kelston Boys’ High ina ua manumālō i le la taaloga ma le ‘au mai Aferika i Saute le EG Jansen Hoërskool i ‘ai e 33 i le leai, ae faapena ona molimauina le finau o le taaloga a le ‘au a le Westlake Boys’ High ma le ‘au malosi mai Egelani le Harrow School, e ui i le finau na sola le ‘au mai Aotearoa ma le manumālō e 22 i le 5 a le Harrow.
O loo taumafai nei ‘au e lua ina ia toe foi mai se tasi ma le manumālō poo le siamiupini i Niu Sila, ae afai ae manuia taumafaiga, ua faamauina o le lona tolu ai lea o taimi ua sola ai ‘au a Niu Sila ma le ipu o lenei taamilosaga.
O lenei polokalame tau taaloga, le World Schools Festival o se tasi lea o polokalame tele ua tuufaatasia e aumai faatasi ai ‘autaaalo faavaomalo a a’oga, e tauva ma taaalo i taaloga o le lakapi, kirikiti, o le taaloga netipolo, o le hockey ma le taaloga o le soka, lea o le a faaopoopo i le tausaga 2025.
Na ta’ua o lenei polokalame tele ua tuufaatasia e faailo ai taumafaiga a fanau, ae o latou foi agavaa ma le tomai e faatino ai taaloga, ma le faamoemoe ia omai faatasi fanau a’oga e taaalo faatasi i se siosiomaga lelei.
O lenei polokalame na amata i le tausaga 2018, ma na maitauina le to’atele na lagolagoina lenei taumafaiga.
Puna o Faamatalaga: https://www.nzherald.co.nz/sport/rugby/school-rugby/schools-rugby-kelston-boys-high-and-westlake-boys-high-start-strong-at-world-schools-rugby-festival/HKAVVENUINEDNJIP6SWJ6XPDEY/
