O le afio atu ai o le Tamaitai Palemia o Niu Sila ma lana aumalaga o nisi o sui o le Kapeneta ma le Palemene a Niu Sila, e talia lo latou valaaulia mai le malo Samoa, e tauala mai le afioga a le Tamaitai Palemia, Afioga Fiame Naomi Mata’afa, mo le faailogaina o le 60 tausaga o le Feagaiga Faauo poo le Treaty of Friendship a Samoa ma Niu Sila, na malaga ai le aumalaga ma ave le latou Tulafale, o lē na fai ma fofoga o le aumalaga mai Aotearoa e feagai ma le saofa’iga a tulatoa o le atunuu i le sauniga mamalu o le ‘ava o le feiloa’iga na faatino i Vailima.
O le tofa ia Lemauga Musuiaiga Neil Tapu Sitagata, o se alii e ui ina talavou i le maitau atu i ona foliga faaletagata, ae e maeu lava lona tulai mai i lea aso i le faatinoga o ona tiute faa-Tulafale ina ua saga’i e faasoasoa ‘ava o le aso. E mautinoa o le a avea ma pinefaamau e lē mafai ona galo i lenei alii talavou, lona sao tautele na faatino i lenei aso sili ona tāua i le talafaasolopito o atunuu e lua.
I luga o le facebook o loo fefaasoaa’i ai lagona meemee o tagata, e lē gata i ona aiga ma uo, ae o le to’atele lava foi o i latou na matamata i video o lea sauniga ma latou maofa ai i le laititi o le Tulafale o le aumalaga mai Aotearoa, ae o le malosi o lona si’ufofoga ma le manino o lana lauga i lea aso na matuā talitonuina ai, o se alii talavou ua matuā atoatoa ona faaaupegaina i le aganuu.
O se tasi o tagata o loo momoli lana faamalo ia Lemauga i luga o le facebook i upu nei, “Amuia le manava na e fanau mai ai, ua tau lau o lou faamoemoe ua e pule i mea tetele….” O nisi foi sa taula’i le faamalo i le tuaa o Lemauga, le afioga ia Tauanu’u Sealiimalietoa Perenise Sitagata Tapu ma latou ta’ua ai, e lē fesiligia le tomai o lenei atalii vaeane ona suafa matai, auā o lona tuaa, o se faiaoga i Niu Sila nei e a’oa’oina le gagana Samoa ma le aganuu i totonu o kolisi maualuluga.
O le tulai mai o lenei alo o Samoa i se tulaga maoa’e i lona tomai i le aganuu a Samoa aemaise lava i le manino o lana tautala i le gagana Samoa, o se lu’itau ae o se faamautinoaga foi i isi uma alo o Samoa o loo ola i nei atunuu, e mafai lava ona avea i latou ma matai faiupu a le atunuu i se tulaga atoatoa e lē gata i le malamalama aemaise lava i le tautala. O se tomai matagofie e mafai lava ona fai pe a tuu atoa i ai le loto.
