E 3 vaiaso o loo taamilo ai i totonu o le atunuu o Saina le ausiva a le pulega o tagata tafafao maimoa mai fafo i le faamoemoe e faalauiloa ai a tatou siva o tu ma aganuu.
Ua faailoa e le pulega o tagata tafafao le Samoa Tourism Authority, ua mae’a se fiafiaga a le ausiva o le Samoana i se faaaliga o taleni o le musika a tupulaga talavou i se tasi o aai tele o Saina e ta’ua o Chengdu, ae o le vaiaso nei o le a faafiafia ai i le faaaliga autu o musika e faia i le aai o Quindao i totonu lava o Saina.
O loo aofia i le ausiva a le Samoana nisi o tamafanau a le atunuu ua matuā lelei i le faatinoga o le siva ailao afi o se tasi o siva ua lauiloa ai Samoa i atunuu i fafo.
O le molimau a le pulega o tagata tafafao i se pepa o faamatalaga, e toatele tagata o aai ua mae’a faia ai faafiafiaga a le tatou ausiva ua faailoa ane lo latou fiafia tele i ia faafiafiaga a lo tatou atunuu.
O se valaaulia a le ofisa o le Amepasa o Saina i Samoa ua mafua ai ona malaga atu i lea atunuu le aufaafiafia a le pulega o tagata tafafao mai fafo i Samoa.
