O le Aso Lua o lenei vaiaso e taunuu ai i fanua le aulakapi taitoafitu a tamaitai Ausetalia ua faaigoaina o le Burraneer Rays i le faamoemoe e tausinio i le taamilosaga lakapi fitu a le Vodafone, mo le faailogaina o le 60 tausaga o le tutoatasi.
O loo faiaoga i le ‘au se alo o Samoa sa taalo i le ‘au o le Wallaroos le susuga Seei Sau, ma ua faailoa ai e le kapeteni o le ‘au a tamaitai Ausetalia i se pepa o faamatalaga, ua leva ona fia pai mai i Samoa sei feiloai ma ‘au malolosi o le taamilosaga. A o iai i Samoa o le a iai ni polokalame o le a auai atu ai i aoga i le lio o le taulaga, ma feiloai foi i nisi o le tatou atunuu.
A o tālia ai le toai taunuu o le Burraneer Rays mai Ausetalia, o le Aso Lua foi lenei o le a faamuta ai le lesitala atu o aulakapi taitoafitu i le vaega o alii ma tamaitai mo le taamilosaga a le Vodafone, a o lumanai le Aso Lulu o le a faalauiloa ai kapeteni ma ‘au taitasi i se sauniga i le faletalimalo o le Tanoa Tusitala.
