E to’asefululima se aumalaga mai Samoa o sui o le au fai atina’e lafumanu ma sui o le matāgaluega o faato’aga ma faigafaiva i le vaega o lafumanu, o loo i Brisbane i Ausetalia i le vaiaso nei, i le faamoemoe e auai i se a’oa’oga faamasani e autū i le tapenaina lelei o aano o manufasi mai manupapalagi ma meaituaolō mo le tulaga saogalemu i le faaaogāina i mea taumafa.
O se a’oa’oga tāua o loo fetufaa’i ai ma sui o le matāgaluega o faato’aga a le malo o Ausetalia, i latou o loo gafa ma lea ituaiga o tapenaga.
Ua mafai ona faatino lea fetufaa’iga i tomai faapitoa i lea vaega tāua o le atina’e o lafumanu ona o se polokalame ua faalauiloa e le matāgaluega o faato’aga ma faigafaiva a lo tatou malo, ua galulue faatasi ai ma le matāgaluega o faato’aga ma lafumanu a le malo o Ausetalia.
O le autū o lea polokalame o le faamalosia lelei o le tulaga lelei o atina’e lafumanu i Samoa, e pei ona tatala le avanoa ia i latou o faatino atina’e lafumanu tuma’oti e auai o latou sui i le a’oa’oga i Ausetalia.
