E toasefulufitu le aumalaga mai le atina’e o tagata tafafao i Samoa o loo iai nei i Amerika Samoa, i le faamoemoe e faia se faalauiloa e toe matimati ai le uunaia o le atina’e ina ia tosina mai tagata i le teritori e malaga ai i Samoa tutoatasi, e tafafao ai.

O le tasi o autu o lea malaga ia tulituliloa talanoaga o le Atoa o Samoa talu ai nei sa talanoaina ai le galulue faatasi o Samoa e lua i le unaia o le atina’e o tagata tafafao.

O le faalauiloa lenei o loo faagasolo mo aso e lua ma le faamoemoe o le a maua ai nisi metotia e unaia ai le toe faaleleia o atina’e tau tulisi i Amerika Samoa ma Samoa tutoatasi.

O loo faamauina o le tausaga e 2019 a o lei aafia le atina’e lenei i le pipisi o le faamai koviti i le lalolagi, e 15 afe tagata tafafao mai Amerika Samoa sa afea lo tatou atunuu ma e tusa ma le 31 miliona tala se tupe na tafe mai ai i le tamaoaiga o Samoa tutoatasi.