O loo agai nei suesuega a leoleo i Kuiniselani pe faamaonia ni sootaga o le auso lea sa afua ai le faalavelave tele i le setete i le vaiaso nei ma le maliilu ai o malu o le malo e toalua, ma ni kulupu faatupu faalavelave o loo matauina i luga o upega tafailagi.
I se lipoti lata mai o le faalavelave lea e pei ona auina muamua atu i le Aso Lua ua faailoa ai e leoleo o loo suesue foi pe iai se faamaoniga e foliga sa mailei atu nai leoleo i lea nofoaga ina ia fasiotia ai.
O i latou na faatupuina le faalavelave o le alii o Nathaniel Train sa avea muamua ma puleaoga, o lona uso o Gareth ma lona toalua o Stacey lea ua maliliu uma ina ua tafana e leoleo mulimuli ane i le po lea o le Aso Gafua o le vaiaso nei.
Saunoa le komesina o leoleo i Kuiniselani o suesuega o loo silasila ai i sootaga o i latou ia ma nisi o kulupu, extremists i luga o upega tafailagi ina ua aliae nisi o posts ma faamatalaga sa faia a Gareth Train i luga o upega tafailagi.
Na faaoo foi faamaisega e le alii Palemia i aiga o nai malu o le malo ua maliliu ma le atunuu atoa ona o lenei faalavelave matuia.
O loo faaauau pea suesuega ae ua saunoa le premier o Niu Sa Uelese, Dominic Perrottet o le Sydney Opera House o le a faalanumoana uma i le po anapo e manatua ai nai malu o le malo ua maliliu a o faatino o la tiute.
