Na faaletonu le vaalele a le LATAM a o iai i luga o le ea, o le mafuaaga lea o le faamanu’alia o nisi o le pasese ma le aufaigaluega ananafi.

E 14 taavale a le falemai na faanatinati atu i le malaevaalele faavaomalo i Aukilani faapea ai ma nisi o auaunaga ananafi i le latalata i le itula e 4 i le afiafi na faatalia le faigamalaga na sau mai Sini i Ausetalia.

E tusa ma le 50 tagata o le pasese na togafitia e sui o le aufaigaluega a St John e tusa ma lipoti a le Herald, ma e toatasi na faamanu’alia tigaina ae o isi o manu’aga mitimiti.

E lipotia o le toasefulu o le pasese o lea na auina atu i le falemai i Middlemore, e toatasi i le falemai tele i Aukilani ma le isi toatasi i le falemai o tamaiti, le Starship.

Ua faatoese pe Latam e tusa ma le faaletonu o le vaa ua mafua ai ona manunu’a nisi o le pasese faapea le aufaigaluega a le vaa.

E ta ane lava le itula e 6 i le afiafi ananafi o loo pisi pea taavale ambulance i le malaevaalele.

O molimau a nisi o le pasese na faate’ia i latou i le pa’ū faafuasei o le vaa a o iai i luga i le vanimonimo.