O le faamoemoe lenei o le tufatufaina o faailoga e taualuga ai le fonotaga ua ta’ua o le Social Work conference.
O se tasi o faafeagaiga o ia foi o se tasi o sui a le faalapotopotoga o le Toomaga mo ē Puapuagatia, Jeremy Faumuina i pepa o faamatalaga mai le faalapotopotoga na faaalia ai le loto faafetai o lenei auauna e ala i sana tautua.
“E matuā faagaeetia le loto i lenei faaeaea aemaise le faaeaea a nai o tatou tagata eseese o loo aumau i Niu Sila e ala i le latou lagolago matou te tautuaina faatasi ai soo se tasi.
“O lenei faailoga e faapitoa lea mo i latou sa tuuina mai lenei faaeaea ia te au.”
“E le gata i lea o si matou aiga ia Shelley Gibb Faumuina, mo le fesoasoani e ala i le galulue vaavaalua e faasoa atu le auaunaga a le Toomaga i Samoa.”
Na momoli ai faamanuiaga ma le faamalo a le Peresetene ia Siliniu Lina Chang i lenei tamalii ma lona agaga fesoasoani i le Toomaga.
“Faafetai mo lau tautua i alo ma fanau o loo iai le nofoaga o le Toomaga aemaise o la matou galuega o loo faia pea auā le tali atu i mafatiaga o tatou tagata o loo moomia le fesoasoani.”
O le Susuga i le Faafeagaiga ia Faumuina ma lona aiga ua loa foi la latou lagolago i tausaga e tele patino lea i le nofoaga o loo aumau ai fanau a le Toomaga le Campus of Hope.
I le tele o tausaga o lenei faigapaaga o le aiga lenei o le Faafeagaiga sa faatautaia se polokalame i Christchurch lea o loo mafai ona auina atu ai alo tamaitai a le Toomaga mo le 3 masina i Niu Sila o se vaega o le toe foufou ai o olaga o nei tamaitai mai faafitauli sa feagai ai ma latou.
Ae le gata i lea, o meaalofa ma asiasiga e pei ona iai le asia ai e Faumuina o le Toomaga i le tausaga nei a o faagasolo ai le sailiga seleni e fesoasoani ai i ana auaunaga ma le tausiaina o alo ma fanau o loo aumau ai.
