O le taaloga faitaulia lona lua a le Manu Samoa 15 ma le ‘au malosi a Georgia i lana malaga taamilo o loo iai nei i Europa, ua manumalo ai i le ‘ai e tasi. E mae’a le taaloga na faia i le vaveao o le Aso Sa na tea nei, e 20 le Manu Samoa i le 19 a Georgia.
O le taaloga o loo sosoo ai nei o le a taaalo ai ma Romania ma mae’a ai taaloga e tolu faitaulia o lana malaga taamilo. O le taaloga muamua a le tatou Manu Samoa 15 na malolo ai i le ‘au a Italia i ‘ai e 17 i le 49.
O le malaga taamilo a le tatou ‘au, o se tasi o tapenaga tāua mo le sauni atu i le Ipu o le Lalolagi i le lakapi iuni, i le tausaga fou 2023 lea o le a faia i le atunuu o Farani.
Ae i le aulakapi taitoafitu a le Manu Samoa, o lea ua faailoa pulu ma ‘au o le a tausinio ai i le vae o le taamilosaga fitu o loo sosoo ai nei, i le masina fou o Tesema e faia i Dubai.
O le tatou ‘au o loo lisi mai i le Pulu D, o le a fetaui ai ma Amerika, Kanata ma Iapani. O le pulu A o loo iai Ausetalia, Aferika i Saute, Peretaia ma Kenya, Pulu B o loo iai Fiti, Argentina, Niu Sila ma Uruguay, Pulu C o le a taaalo ai Farani, Aielani, Sepania ma Uganda.
