Ua manumalo le Junior Manu Samoa i le PacificAus Sports 2022 Oceania Rugby U20 Trophy.
E ui ina malolo ia Tonga i le Taaloga Muamua o le taamilosaga i ‘ai o Tonga e 20 i le 19 a le Junior Manu Samoa, ae i le Taaloga Lua na Iloilo ai i le aoauli o le Aso Toonai, na alu motu ai loa tama laiti o le Manu, e toe faasa’o ma faamautu le latou mau, o le Manu Samoa e siia le Ipu o le taamilosaga.
O le taaloga lona lua na manumalo ai Samoa i ‘ai e 8 i le 5 a Tonga. O le tuufaatasiga o ‘ai o taaloga uma e lua ua manumalo ai loa le Junior Manu Samoa i le Ipu o le taamilosaga. O taaloga uma e lua na faia i le malae o Teufaiva Sport Stadium i Tonga.
O le taamilosaga lenei a le Oceania Rugby U20 Trophy na amata mai le tausaga 2015 ma sa faatulaga e faia i tausaga uma (annually). E agavaa uma iai ‘au laiti a le Pasefika i latou e lei atoa le ta’i 20 tausaga le matutua, se’i vagana ‘au ua uma ona agavaa mo le sailiga o le World Rugby U20 Championship.
Sa amata mai e na o le tasi le taaloga e fai, ae o le tausaga lenei ua sii atu i le lua taaloga e fai, e pei ona faia ai le taaloga muamua i le Aso Lua, 29 Novema ma le taaloga lona lua i le Aso Toonai, 1 Tesema 2022.
O le taamilosaga lenei o loo fesoasoani malosi mai ai le malo o Ausetalia i lana polokalame o le PacificAus Sports ina ia uunaia malosi le galulue faatasi o Ausetalia ma le Pasefika ia saunia ni alafua e tapu’e atili ai tomai o ‘au a le Pasefika ma latou tagata taaalo ina ia mafai ona taaalo i tauvaga tetele o loo taaalo ai ‘au a Ausetalia.
E le gata i lea, ia mafai ai foi ona faamasani ‘au taaalo a le Pasefika i taiala ma tulafono o loo faatino ai taaloga a Ausetalia, ma ia atili faaleleia ai taleni taalo a tamafanau o le Pasefika.
O le Junior Manu Samoa sa siamupini foi i lenei lava ipu i le sailiga siamupini i le tausaga 2020, peitai na toe poloka le taamilosaga i le vaitaimi o faasāsāga o le koviti, lea la faatoa toe fai ai le isi taamilosaga i le tausaga lenei 2022.
E momoli le faamalo i le susuga i le alii faiaoga Galumalemana Rudolf Moors ma le pulega uma a le ‘au aemaise tamafanau a le atunuu na faatinoina le taaloga.
