O le vaiaso nei o loo faagasolo ai i Nottingham i Egelani mai le aso 15 – 21 o Iulai 2024, le taamilosaga o le Ipu o le Lalolagi i le taaloga o le Lakapi Pa’i poo le Touch World Cup, ma o loo faapena ona tausinio ai ni ‘au a Samoa.
O loo faatautaia lea taamilosaga e le Federation International Touch (FIT) ma o le lona sefulu ai lea o taimi ua faatautaia ai lea taamilosaga.
E tele vaega poo categories eseese e aofia i lea taamilosaga ae o loo tausinio Samoa i vaega o le:
- Mixed Open
- Women’s Open
- Senior Mixed (over 30s)
I le amatalia ai o taumafaiga a ‘au taaalo, o le uluai taaloga a tamaitai le Women’s Open na manumalo ai i ‘ai e 10 i ‘ai e 3 a le ‘au mai Hong Kong.
Na faataunuuina foi le uluai taaloga a le Senior 30s peitai na malolo le ‘au a Samoa i ‘ai e 3 i ‘ai e 12 a le ‘au mai Farani.
O le amataga o le vaiaso na faatino ai se jersey presentation a le ‘au a le atunuu mo le faasauni atu ai o ‘au a Samoa mo le ipu e pei ona tufatufaina atu e lē ua tele foi lona sao i faagatama a le atunuu ia Lauaki Fereti Tuilagi faapea ai ma le alii iloga i le taaloga taitoafitu (7s) ma le taitoa sefululima (15s) a Samoa, Alafoti Faosiliva.
Na faia lea vaega tāua i se tasi o faatasiga mo alo ma fanau a Samoa ua filifilia e fai ma avefu’a a Samoa i lea taaloga.
O le isi taaloga mo le ‘au taaalo a Samoa, o loo faamauina toe 10 minute i le itula e 10 i le taeao o le Aso Lua o le a taaalo ai le ‘au o le Mixed Open a Samoa ma Wales, tusa lea toe 10 minute i le itula e 9 i le afiafi a Niu Sila nei, ma o le itula o le 1 i le vaveao ananei o le a iloilo ai ma le atunuu o Lepanona.
O Ausetalia na manumalo i le taamilosaga o le Ipu o le Lalolagi i le tausaga 2019 ae tulaga lua ai Niu Sila.
O lenei taamilosaga mo le Ipu a le Lalolagi o le Lakapi Pa’i e taifā tausaga ma faatautaia.
