O le Afioga Lautimu’ia Afoa Uelese Vaai, o le sui sa tauva i lalo o le Fu’a a le vaega faaupufai o loo tu malo, le Faatuatua i le Atua Samoa ua Tasi, ua manumalo nei i le nofoa o le Itumalo faapalota a Vaimauga 3.
O le faitauga muamua lea o le faigapalota e pei ona iai i le asō, peitai i le maitau atu i le eseesega o palota na manumalo ai Lautimuia i le sui o loo lona lua, le sui tauva mai le vaega faaupufai e puipuia aiātatau a tagata, le HRPP.
Mo le faitauga muamua i le asō ua tulai mai ai palota a le afioga Lautimu’ia o le FAST – 1,425 palota na maua. O le afioga Samau Timani e 1,008 palota na ia maua, ae o le sui tauva Tutoatasi, le afioga ia Feagaimaalii Bruce Toomalatai Utaileuo na ia maua palota e 100.
O nei iuga o palota na maua mai falepalota e 13 sa faatulaga i totonu o le itumalo mo le faigapalota o le asō, ae lei faaopoopoina i ai iuga mai le uluai palota (pre-polling) sa faia i le Aso Lulu o le vaiaso nei lava, faapea iuga mai le falepalota e tasi i Salelologa i Salafai, ma le falepalota faasavali mo i latou i le Falemai i Motootua ma le Nofoaga o Tagata Matutua i Mapuifagalele.
E ui la o lea e lei faaopoopo mai isi falepalota laiti ia e lei faaaofia ai, ae o le matau atu i le mamao ua tulai mai ai le manumalo o le aofaiga o palota a Lautimu’ia, e faigata ai ona toe iai se faitauga i se suiga o le iuga ua tulai mai.
