E 7 ni tagata ua faamaonia mai e leoleo ua pu’e faapagota nei (arrest) i le mae’a ai o se tasi o a latou galuega tele ua faaigoaina o le “Operation Beach”.
O se galuega e ta’ua ua leva ona faatino mai; o le naunauta’iga ia tali atu i gaioiga solitulafono o loo maitauina le faia i lotoifale o vaega o galuega tetele ma atina’e poo i latou e nafa ma galuega tau faufale (Construction Industry).
I faamatalaga mai le Auckland City District Police e ala i se latou faasalalauga i luga o upega tafa’ilagi na o latou faamaonia ai o lea to’afitu o nisi ua faaopoopo atu i le numera o tagata ua taofia ma ua pu’e faapagota ona o gaioiga solitulafono.
Faamanino e le auaunaga sa taula’i lo latou sa’ili’iliga ma su’esu’ega i le faaaogāina ai e i latou o loo aafia i lea matāupu o totogi e tuuina atu (cash wage payment); e faafoliga o ni totogi ae o le mea moni o loo faalilolilo ai tupe e faaaogā e faasolo ai gaioiga faasolitulafono.
Ta’ua i faamatalaga, talu ona amata faatino mai lea galuega a leoleo i le tausaga 2023 ua taofia ma pu’e faapagota e i latou le to’a sefulumaleono (16) o tagata ua aafia i lenei matāupu.
E 9 ni pepa faataga poo search warrants na faatino ai osofa’iga a le auaunaga a leoleo i totonu o Aukilani, e aofia ai faaitu o Ellerslie, o Mt Wellington, Panmure, Mt Roskill, Weymouth, Murrays Bay, Waimauku, ma Whenuapai.
I osofa’iga a leoleo na faamauina le taofia ai o le faitau afe o tupe, o fualaau faasāina o le tele o oloa anagatā ma le taugatā ma le tele o nisi o vaega ua faamaonia ai nisi o molimau i le faatautaiga o le latou galuega.
Faamanino e le ta’ita’i leoleo asiasi, o se leoleo su’esu’e faapitoa ia Detective Inspector Chris Allan o le Financial Crime Group a leoleo, o i latou o loo aafia i lea matāupu tele, na o latou faaaogāina le tupe (cash payments) e faamamā tupe palapalā na o latou maua mai i soligatulafono e pei o le aumai faananā o pauta ma fualaau faasāina ma le faaola ai o le laau maruana, e oo lava i gaioiga faatalitane tulou, i le North Island.
Faaalia foi e Allan o vaega muamua o lea galuega sa pu’e ma taofia ai le to’alima (5) i tupe palapalā ma le to’a sefulutasi na taofia i fualaau faasāina ma moliaga tau i femalaga’iga, e pei ona taofia ai le lata i le $1 miliona o tupe.
Puna o Faamatalaga: https://www.facebook.com/share/p/1SMwCdDBYN/
