E le o toe po le silafia a le atunuu ma le lalolagi atoa i le tulaga ua iai nei le faagasologa o le Ipu o le lalolagi i le lakapi liki lea ua faaiuiu ina ua mae’a taaloga o le sailiga o ‘au e lua o le a finau i le finals e faaiu ai lea tausinioga mo lenei tausaga.
E pei ona silafia o lea ua sao atu le Toa Samoa i le sailiga o le Ipu o le lalolagi i lea faagatama o le a fetaui ai ma le ‘au malosi a Ausetalia le Kangaroos.
Ua molimauina i luga o upega tafailagi le faaalia o le fiafia o nai o tatou tagata ona o taumafaiga a le ‘au ma sa faapea foi se vaaiga i le aso ananafi i le taulaga i Apia ina ua mae’a le taaloga.
A o sauni ai la le Toa mo le taaloga aupito tāua lea o lea tausinioga, ua vaaia pea le faailoa o le lagolago a tagata Samoa i lana ‘au aemaise ai foi nai uso Pasefika e pei o Papua Niu Kini, Tonga, Fiti ma isi atumotu.
Ua vaaia i luga o upega tafailagi sauniga lotu na faia ananafi i ia atunuu ua laei e tagata le lanu moana e faailoa ai latou lagolago i le Toa Samoa.
O se lagona matagofie le tutu faatasi ai o le Pasefika mo le finauina o se avanoa e sii mai ai i le Pasefika le Ipu autu o lea tausinioga mo le uluai taimi pe a manuia faiva o le Toa Samoa.
E pau le fautuaga mai nisi o tuaa sinasina e pei ona fesiligia e talafou so latou finagalo i le mataupu. E lelei le tapuai ma manatua, o le tu a le Samoa, o le faaaloalo ma le avafatafata, ia faaata atu i le lalolagi, nei soona naunau foi i le faaali o le lagolago ae soli ai ma tulafono o puipuiga mo le saogalemu a atunuu o loo tatou nopiai ai aemaise ia aupito sili ona atagia ai Lē o loo faavae ai le malo o Samoa.
Saunoa se tasi tamā matua i le faatalanoaga ma talafou, mo ia poo le ā lava le iuga o le taaloga i le faaiuga o le vaiaso nei, ua manumalo lava le Toa ina ua avea o le atunuu muamua i le Tier 2 e ausia lea tulaga aemaise foi mai le Pasefika.
