Ua avea nei le sui Komesina o le Matagaluega o leoleo, falepuipui ma le ola toe fuataina, le faletua susuga Papalii Monalisa Tia’i Keti, ma uluai sui tamaitai o le Pasefika i le faalapotopotoga ua ta’ua o le Australasian Council of Women and Policing, ua manumalo i le faailoga taualoa a lea faalapotopotoga faavaomalo ua ta’ua o le Audrey Fagan Memorial Award.
O le faailoga taualoa pito maualuga lea a le faalapotopotoga e amanaia ai le sao o tamaitai o galulue ma tautua faaleoleo, i le avea o se faataitaiga lelei e ta’imua i le faatinoina o tiute i le faamalosia o le tulafono, ma isi auaunaga e fesootai i le tautua faaleoleo.
O le fonotele a le faalapotopotoga o le Council of Women and Policing sa usuia i Sini Ausetalia i le vaiaso na tea nei na faailoa ai ma i latou ua faamanuiaina i faailoga taualoa eseese, ae o le faailoga taualoa ua manumalo ai le sui Komesina tamaitai o le matagaluega o leoleo, falepuipui ma le ola toe fuataina a Samoa, o le faatumutumuga lea o faailoga taualoa sa tauaao i lea faatasiga tele faavaomalo.
O le faaeaina o le susuga Papalii Monalisa Tia’i Keti, o le ‘ai foi lea o le tapuaiga a le Matagaluega mai le Minisita ma le Komesina ma le pulega atoa, a o tālia se faaiuga.
E limaselau sui o matagaluega ma tautua faaleoleo mai atunuu Asia ma le Pasefika sa auai i lea faatasiga.
