I le silia ai nei ma le lua vaiaso talu ona tuua Samoa e le afioga i le Palemia, susuga Laaulialemalietoa Leuatea Polataivao Fosi Schmidt mo togafitiga ma siaki faafoma’i i Niu Sila, o le Aso Gafua o le vaiaso nei na te’a ai i tua ma le falema’i o Middlemore i Aukilani le ta’ita’i o le Malo o Samoa, ina ua manuia lana siiga gasegase.
O se saunoaga a le Palemia i luga o upega tafa’ilagi na ia faailoa ai le logoina o ia e foma’i o le Aso Gafua lona aso mulimuli i le maota gasegase.
Ua faafetai ai le Palemia i le mamalu o le atunuu i alofa’aga ma talosaga molia, aemaise o nisi sa asia o ia i le maota gasegase faapea foi faafeagaiga o nisi o ekalesia i Niu Sila.
Le afioga i le Palemia susuga Laaulialemalietoa Leuatea Polataivao Fosi Schmidt i se vaega o lana saunoaga i luga o upega tafa’ilagi o le api o foliga.
O le aso 19 o le masina nei e pei ona sa faailoa e le Sui Palemia le afioga Toelupe Maoiautele Poumulinuku Onesemo i se feiloa’iga ma tusitala ua faamoemoe e toe taliu mai ai i Samoa le ta’ita’i o le Malo.
