O le faipule a le vaega faaupufai a le Greens ua tuumalo, ae o se alo o Samoa, le Afioga Faanānā Efeso Collins, sa manatuaina o se fetu susulu matilatila a lona aiga i lona sauniga i Aukilani i Saute i le aso ananafi.
E pei ona muai lipotia atu, o Efeso, o ia o se alii Faipule, o se tane, o se tamā i se fanau teine e toalua, ma na palasi i le taimi ua mae’a ai se taufetuliga sue tupe mo vaiinu mamā mo tamaiti i le Pasefika i le ogatotonu o Aukilani i le aso 21 o le masina nei o Fepuari, ma fano ai lona soifua.
O le fano o le soifua o Faanānā sa faate’ia ai le toatele o tagata faapea ma lona aiga, e aofia ai lona faletua o Vasa Fia, ma ona alo tamaitai e toalua, o Kaperiela ma Asalemo, lea sa latou faaalia ai, o le taula lea o le latou aiga maopoopo.
O le aufaipolokiki, o tagata lautele e aofia ai ma tamaiti aoga, sa aofia ai ia i latou sa faatasi atu i le sauniga i le aoauli ananafi i le nofoaga a le Due Drop Event Centre i Manukau.
I le amataga o le sauniga, o le tusi solo, Karlo Mila, sa ia faitauina se tauloto tusi (poem) sa faaiuina e faapea, “Ua avea oe ma se tuaa o tupuaga sa matou iloaina lava o oe lava lea.”
O le sui sooupu o le aiga, Taito Eddie Tuiavii, sa ia faia se faafeiloaiga aloaia i le gagana Samoa, i le ave ai o lana faaaloaloga ia Faanānā ma lona afioaga.
Faaalia e Tuiavii, o se faalogona e lē mafai ona faamatalaina le agaga faavauvau mo le latou siamupini.
O tuafafine o Faanānā sa tutulai ma faasoa tala mai i lona soifuaga.
Faaalia e lona tuafafine ia Jemima Collins, a o laititi ane, o Faanānā sa iloa ia Boppa, e pei ona tuputupu a’e sa fiafia e taalo ma matamata i le kilikiti.
E lei tele foi ni mea sa latou maua a o feola ane i Otara, ae sa tausia i latou faa’oaina i le alofa.
E na o le lua vaiaso sa aoga ai i le aoga lauiloa a le Auckland Grammar School, ae lei faia lana faai’uga e alu ese ona o manatu faailogalanu e pei ona faaalia ai e lona tuafafine.
Sa liliu ma aoga i le kolisi a le Tangaroa College i Otara, ae lei faaauau atu ai i le Iunivesete o Aukilani.
Sa faalogo foi le aufaalogologo, o Faanānā e masani tele ona loloto le faigauo ma Iesu, ona o lea mafutaga, sa mafua ai ona pa’i atu i le toatele o tagata.
O le isi ona tuafafine, o Millie Collins, sa ia faamatalaina lona tuagane o se “tama lanu auro o le latou aiga”.
O le tamā ma se tina ia te ia, ae i ona uso, o se tuafafine ma i ona kaseni ma uo, o le latou fetu pupula matilatila.
Sa aofia ai i le sauniga ia faipule uma e 15 a le pati a le Greens, e aofia ai ma soā-taiulu ia Marama Davidson ma James Shaw, le alii Palemia Christopher Luxon, le taitai o le pați a le Labour Chris Hipkins, le sui taitai Carmel Sepuloni, le tamaitai faipule o Barbara Edmonds ma le faipule o le itumalo Panmure-Otahuhu o Jenny Salesa.
Sa faatasi ai foi le faipule a le National, Gerry Brownlee, le pulenuu o le taulaga o Aukilani Wayne Brown, soā-taitai o le pati a Maori, Debbie Ngarewa-Packer ma Rawiri Waititi.
O le tamaitai taitai lagolago o le Greens, Marama Davidson sa fai ma sui o le pati i lana molimau, ma ia manatua ai Faanānā o se tagata mataina, e fiafia tele i lona aiga ma ona tagata Pasefika.
Sa ia faaalia ai, o Fia ma le la fanau teine, o le faanaunauga atoatoa lea o Faanānā, ma ana galuega lagolago sa masani ai ona ogatotonu lona faletua ma lona aiga.
O le faletua o Faanānā ia Vasa Fia Collins, sa mulimuli saunoa e pei ona tutu faatasi ai ma lana fanau teine i ona autafa.
Sa ia faailoa, o ia ua na o se tina faatauvaa sa faaipoipo i se tane uigaese, ma o Faanānā sa fanau mai e avea ma taitai.
Faaalia e Vasa i le potopotoga, afai e te iloa o ia, e te malamalama lelei ai i le alu ma saofai i tua i se potopotoga, ae e faapefea ona e misia se tamaloa e 6 futu, 4 inisi ma se leo taalili ma laumata ‘ata’ata?
E na te tausia foi o ia e pei o se tupu tamaitai, o se tamā e faatino ona tiute faatamā i le ave o lana fanau i le aoga, aoaoina i le faapefea ona tatalo ma ave iai aisakulumi pe a lē o tilotilo atu.
E na te faatāuaina foi le malamalama o lona tupuaga Pasifika, e masanı ai ona ia aoaoina ma fiafia i tupulaga talavou, e pei ona maliu a o ia tautuaina isi.
E faitau afe ma afe tagata sa faatumulia ai lea nofoaga mo le faamavae atu ia Faanānā, o se tauaofiaga sa faatumulia ai i musika, pesepesega, solo e faitauina, tala, loimata ma le talie.
