I le vaiaso atoa na tea nei na faagasolo ai sauniga faalepuleaga, sauniga faaleaiga ma le sauniga faapitoa i le tuumalo o le afioga i le Akiepikopo o le Puleaga a Samoa Apia, le afioga Alapati Lui Mataeliga.
O le Aso Toonai na lagomau ai i luma maota o le Malumalu o le Ekalesia Katoliko i Malololelei.
O le sauniga faapitoa na molimau ai taitai o le Malo, ma le taitaifono o Ekalesia soofaatasi i le soifua galue ma le tautua a le afioga i le Akiepikopo i le 20 tausaga o avea ai ma taitai o le puleaga a Samoa Apia.
Sa molimau ai foi le sa avea ma Palemia o le atunuu susuga Tuilaepa L Sailele Malielegaoi ma le sa avea ma Ao o le Malo le afioga Tui Atua Tupua Tamasese Efi.
O le tamaitai Palemia o le molimau autu o le sauniga faapitoa sa faia i le malumalu o Maria Imakulata i Mulivai i Apia.
O le faaaloalo faalemalo i toe sauniga o le afioga i le Akiepikopo na ufi ai lona Sa i le tagavai poo le fu’a o le Malo tutoatasi o Samoa, ma tauave foi lona Sa e le vasega o Malu o le Malo.
O le tamaitai Palemia na ia tauaao le tagavai i le taitai o le puleaga ua ia tauaveina le tofiga mo le taimi nei le afioga Patele Pio Galumalemana, o ia foi sa gafa ma le galuega faaositaulaga i le sauniga i le tuugamau.
