Ua mae’a ona tuuina atu le tali tetee a Papalii Sia Figiel i moliaga a leoleo e pei ona sa faailoa e ana loia i le tasi o valaauga o lenei mataupu, peitai o le toe fofogaina o le mataupu lenei i le amataga o lenei vaiaso na faailoa ai e ana loia, ua iai se lagona o lē o loo molia o le a iai se suiga o lana tali i nisi o moliaga o loo tuua’ia ai.
E lē o iloa poo ā ia moliaga ae o lea foi ua faailoa e ana loia ua toe faamaui i tua le talosaga e tatala i tua lē o loo molia.
Ua faaauau pea ona nofo taofia Papalii Sia Figiel i le vaaiga a leoleo i le falepuipui i Tanumalala e faatali ai le aso 19 o Aokuso o le a toe tulai ai.
O le valaauga lea e tatau ona tuuina atu ai se faamatalaga mai loia a leoleo i tulaga ua faailoa atu e loia a lē o loo molia.
E lei tuuina atu lava e loia a le itu o loo tuua’ia se lipoti i le tulaga o le soifua maloloina o le mafaufau o le tamaitai o loo molia, auā tasi lea o talosaga na tuu avanoa ai le faamasinoga o se sailiiliga i le tulaga o iai le mafaufau o Papalii Sia Figiel.
