Ua amata ona toe aga mai le autaalo a Niu Sila ma isi atunuu uma sa auai ai i le faamoemoe o Taaloga a Malo o le Taupulega poo le Commonwealth Games e pei ona talimalo ai Birmingham.
Ae i le faagatama o le lakapi e pei ona faaauau ai nisi o faamoemoe mo le ‘au a le atunuu le All Blacks ua faailoa se faatalanoaga a le second five o le ‘au David Havili i le Newshub i le aso ananafi e faapea o ia e talitonu e mana’omia ona talia e tama taaalo le tulaga faaletonu ua iai nei le ‘au aemaise le faia’ina i le faai’uga o le vaiaso ia Aferika.
Fai mai Havili o le matafaioi a i latou uma le ‘au atoa ma e malosi lona manatu o le a toe foi le All Blacks i lona tulaga masani ma e tele foi le galuega e ao ona faia e i latou o tama taalo ina ia toe foi ai i lea tulaga.
O loo faatali e le to’atele se isi gaioiga mai le faia’oga o le ‘au i le sauni atu i le fetauiga lona lua ma le Springboks i le aga’i atu i le faai’uga o le vaiaso.
