Ua lima tausaga e le o toe faia se sauniga faalemalo e tauaao ai faailoga o pine taualoa mo tagatanuu o Samoa ua latou faia ni tautua iloga e le gata i le malo ma pisinisi, o i latou ua maualuga le tautua i soo se taaloga ae faapea le tautua i totonu o nuu ma afioaga.
O lea ua tapena nei le komiti o faailoga o pine taualoa a le Malo e saili ni o tatou tagata i Samoa ma atunuu i fafo e agavaa i lea faaaloalo maualuga ma le faamoemoe o i latou o le a faamalieina aiaiga e latou te maua ai ia pine taualoa, ua fuafua e faae’e iai i se taimi o le masina o Me, e avea ai o se tasi o polokalame tāua o le atoaga o le 60 tausaga o le Malo Tutoatasi o Samoa lea e mae’a i le faaiuga o le masina o Me o le tausaga nei.
Ua fa nei vaiaso talu ona faasalalau e le komiti le tuuina atu o ni suafa o tagata e tatau ona agavaa mo ia faailoa o pine taualoa ae oo mai i le taimi nei e na o le toavalu tagata ua tuuina atu suafa e nisi ua latou lagolagoina.
O le mafuaaga lea o le faatalauula a le komiti i le atunuu i Samoa ma soo se vaega o le kelope e tuuina atu ni suafa o tagata ua tatau iai lea faaaloalo poo nominations.
Le taitaifono o le Komiti o faailoga ma pine taualoa a le Malo le tofa Agafili Tomaimano Shem Leo o le Ofisa Sili o le pulega o le matagaluega a le Palemia ma le Kapeneta.
O le tausaga e 2017 le tufaga faailoga faapitoa ma pine taualoa lea e toa 13 i latou na tauaao iai lea faaaloalo.
O le faamai misela, sosoo ai ma le Koviti-19 na mafua ai ona to’a lenei polokalame a le malo i le lima tausaga ua tuanai.
