O le 900 o alii ma tamaitai leoleo ua iai nei e leo lava lea mo le puipuiga ao tapena le Malo o Samoa i lana taligamalo o le Fono a taitai o Malo o le Taupulega o le a usuia i lo tatou atunuu i le masina o Oketopa o le tausaga fou 2024.
Ua faaalia e le Komesina o le matagaluega o leoleo, falepuipui ma le ola toe fuataina le susuga Auapaau Logoitino Filipo, e 400 nisi leoleo o loo manaomia ina ia maua ai se aofaiga e tasi le afe limaselau o Malu o le Malo, e faia galuega masani ma faatino le puipuiga o le saogalemu pe a usuia lea fono tele faavaomalo i lo tatou atunuu.
Faaalia e le Komesina o leoleo afai ae oo atu ina faatino le faamoemoe ae e le maua lea aofaiga, e ono tapatapa loa i se fesoasoani mo ni leoleo mai nisi o atunuu tuaoi o le Pasefika.
O le faafitauli tele o loo feagai ma le matagaluega e pei ona faailoa e Auapaau, o le faamavae o nisi o leoleo e mafua o nisi ua maua avanoa i galuega faavaitaimi, pe ua suia foi galuega e tautua ai, ma nisi ua tuua le galuega ona o isi mafuaaga e aofia ai ma nisi o Malu o le Malo ua malolo litaea.
Ua mae’a se tasi o sailiga ua maua ai leoleo fou e 40, ae o loo sauni se isi sailiga mo le ogatotonu o lenei tausaga, ma le amataga o le tausaga fou.
