I le lata i le 30 tausaga talu ona faatuina le sosaiete e vaaia le puipuia lelei o meaola e pei o taifau ma pusi i Samoa, e na o le pau lava lea o le auaunaga o loo togafiti ai le ola lelei o ia meaola ma taofia ai le taaloa ma le pipisi mai o ni faamai o latou feaveaiina i tagata soifua.
Ua silasila nei le sosaiete e faalautele le latou tautua i le atunuu atoa peitai e iai luitau o feagai ma latou e pei o le tau le maua o ni fomai manu ma ni tagata e aoaoina lelei mo le faia o le galuega.
O fesoasoani o loo maua mai fafo e le sosaiete o loo mafai ai ona faatino togafitiga o ia meaola, aemaise o le maua ai o vai faafomai e faia ai togafitiga.
Ua faaalia e se sui o le komiti faatonu o le sosaiete e puipuia meaola i Samoa le afioga Tu’u Fu’a Lafaialii Hazelman, o le naunautaiga o loo iai ia galulue faatasi tagata uma ma le sosaiete faaopoopo iai ma le pitolaau a le aufaasalalau ma tusitala e faatino se galuega e mafai ona lagolago ai ia latou taumafaiga e togafiti meaola ma taofia nisi faafitauli e pei o faamai taifau ma pusi e faaono aafia ai tagata soifua.
O togafitiga ma taotoga o loo faasavali i nisi taimi o nuu ma afioaga ua faaalia e le sui o le sosaiete ua matauina le toatele o aiga ma tagata taitoatasi ua latou tali ane iai ona ua silafia ma malamalama ai i le ta’ua o le vaaia o lelei o meaola.
O le vaiaso fou le galuega i Savaii o le a galulue ai ni fomai manu mai Niu Sila mai le faalapotopotoga o le South Pacific Animal Welfare ua ofo fua lo latou taimi e togafiti ai taifau ma pusi i le motu o Savaii.
