O le māta’itū ai pea i le taimi nei e le matāgaluega o le soifua mālōlōina o le pipisi o le faama’i misela i Niu Sila ma Ausetalia faapea nisi o motu o le Pasefika, ua faailoa ai i faamaumauga lata mai a le soifua mālōlōina, e 27 pasene le aofa’i o fanauiti i Samoa e mana’omia le faia o tuipuipui o le misela.
O se pasene ua aofia ai fanau e le’i atoa tuipuipui o lea faama’i, peita’i o le 73 pasene o fanauiti a le atunuu ua mae’a o latou tuipuipui.
E 22 fanau sa masalomia ua maua i le misela e pei ona faailoa e le matāgaluega o le soifua mālōlōina e ala mai i le feiloa’iga a tusitala ma le sui Palemia i le Aso Faraile ua mavae peita’i o su’esu’ega na faia ua faamautū ai e lē o le misela na aafia ai lea 22 o fanauiti.
O fautuaga mo tagata e malaga e ulufale mai i le atunuu e tatau ona fai tuipuipui o le misela ma ia mautinoa e lē o aafia i ni āuga o lea faama’i i le taimi e taunuu ai i Samoa i malaga a vaalele.
