O tapenaga a Samoa i lana taligamalo i le fono a taitai o Malo o le Taupulega i le tausaga e 2024, ua toe manaomia ai le fesoasoani a leoleo o le Malo o Niu Sila mo le itu i le puipuiga poo le security.
O le fono a malo laiti tau atia’e o le lalolagi sa usuia i lo tatou atunuu ia Setema o le tausaga e 2014 sa malaga mai ai foi se vaega o leoleo mai Niu Sila e faatino lea fesoasoani.
Ma o talanoaga talu ai nei a le Komesina o Leoleo le susuga Auapaau Logoitino Filipo ma lana aumalaga ma le Komesina o leoleo i Aotearoa o le tasi lea o mataupu sa faatalanoa ai, e pei ona faailoa e le sui Komesina le susuga Papalii Monalisa Tia’i Keti.
Faaalia e Papalii o le taligamalo o loo tapenapena iai, o se fono tele faavaomalo e tatau ona maualuga sauniuniga i le vaaia o le puipuiga ona o le toatele o taitai o Malo o le lalolagi o loo avea ma sui o Malo o le Taupulega o se faalapotopotoga e silia i le 50 atunuu o loo ofaga uma iai.
O le feiloaiga a Komesina o leoleo o atunuu e lua i se valaaulia a le Matagaluega o leoleo o Niu Sila, sa faatalatalanoa ai foi fesoasoani e mafai ona tuuina mai mo le tautua a le matagaluega o leoleo i Samoa, aemaise o ni fesoasoani o le a mafai ona tuuina mai i le faagaioia o le uluai Kolisi mo aoaoga faaleoleo ua amata fausia nei i Tafaigata i se vaega o eleele o le Malo sa iai le falepuipui ua tapunia.
