O se faamatalaga tusitusia mo le silafia e tagata lautele poo se public statement mai le sosaiete a loia i Samoa, ua ave ai se tuualalo i le ta’ita’i o le malo le afioga i le Palemia susuga Laaulialemalietoa Leuatea Poalataivao Fosi Schmidt i ona avea ai ma Minisita o le Matāgaluega o leoleo, falepuipui ma le toe fuata’ina ma le ofisa o le Loia Sili, ae o loo talitonu le sosaiete e iai moliaga tau solitulafono o loo aafia ai le ta’ita’i o le malo.
Ua faailoa e le sosaiete lo latou faafetaia o le saunoaga a le Palemia i le sauniga na faatauto ai le paea’iga fou a le Palemene ma lana faigāmalo fou e pei ona ave lana faamuamua i le tausisia o pulega lelei, e mulimulita’ia ai ala o le tulafono ma pulega manino e lima ta’ita’iina i le faimeatonu.
Peita’i o le silasila a le sosaiete o tofiga minisita o le Kapeneta e gafa ma faiga faavae ma le faagaioia o galuega tau i le malo, ae o le tiute tauave o le Komesina o leoleo ma lana matāgaluega ua faataoto le ālafua faatulafono e faatino ai ona tiute tauave ma galuega fai.
E manatu le sosaiete a loia i Samoa o aafiaga tau moliaga solitulafono o le Palemia e ao ai ona faataoto mai i se ta’iala e faamautinoa ai, e tuto’atasi le faatinoina o su’esu’ega a leoleo ma le tuuina atu o moliaga i le faamasinoga e aunoa ma le faalavelaveina.
O atugaluga ma popolega o le sosaiete o le avea o le Palemia ma Minisita o Leoleo ma le Ofisa o le Loia Sili, ae o loo iai ni ona aafiaga tau moliaga i le faamasinoga, o se aafiaga lea i le tauaveina ai o ona tiute faalemalo poo se conflict of interest.
O le feiloa’iga muamua a le ta’ita’i o le malo ma tusitala ina ua ulufale le faigāmalo fou e tauave le pulega o le malo, na faailoa ai e le Palemia susuga Laaulialemalietoa Leuatea Polataivao Fosi Schmidt, na te lē aiāina le galuega a le faamasinoga e tuto’atasi ae o lana mau tauave e mamā o ia mai ni aafiaga tau solitulafono.
O loo tālia se faai’uga a le faamasinoga i nisi o moliaga faasaga i le susuga Laaulialemalietoa e pei o moliaga o le taumafai e natia le faia o le amiotonu ma tuua’iga o le taufaaleaga lea o loo molia ai i se tagi a ni alii leoleo se to’alua e le’i oo i le taimi e su’esu’eina ai i le faamasinoga.
O le sosaiete a loia i Samoa o se faalapotopotoga o loia latou te faatāua le mulimulita’i i ala o le tulafono le rule of law, ma opoopo ma uumau le tulafono faavae o le malo o Samoa.
Ae i le faamatalaga faalaua’itele ua tuuina mai e le sosaiete a loia, ua faailoa ai e se loia sinia o Miruel Lui sona atugaluga i le leai o se soālaupulega na faia muamua e logoina ai sui o le sosaiete i le matāupu.
O lana mātau e pei ona ia faailoa i sona finagalo i le auala o fesoota’iga le api o foliga, e faapolokiki le silasila a ē na faia le faai’uga ma o se faatofāla’iga a ni sui se to’avalu o loia, o loo avea ma sui o le council poo le pulega faatonu o le sosaiete a loia i Samoa.
O se faatofāla’iga ua faaalia e lea sui o le sosaiete e le’i lelei ona fautuaina, ma e lē talafeagai.
