Ua manana’o le komiuniti o tagata Initia i Ausetalia ina ia aloa’ia le faailogaina o le Diwali i Ausetalia.

O lipoti a le 9News i le taeao analeila ua ta’ua ai le mana’oga o tagata Initia ina ia faia se aso mālōlō i setete uma o Ausetalia e aloa’ia ai le faamanatuina o lea aso tāua i la latou foi aganuu.

O le Diwali lea e faaigoa foi o le Deepavali, o le faaaliga tele lea faaletausaga o molī ma o se tasi o vaitau mo mālōlōga a tagata Initia, e tai pei lava o le Kirisimasi.

E aofia ai le faamamāina o fale, faiga talosaga ma le tutuina o moliga’o ma mea ‘ila‘ila.

E masani ona eseese aso e pa’ū iai i tausaga ta’itasi ma e fua lava i le tulaga o le masina ma le la.

O le tausaga nei la e pa’ū tonu i le asō le aso 31 o Oketopa.

Fai mai le Peresetene o le Hindu Council of Australia, Sai Paravastu i le lipoti, e manana’o e faia se aso mālōlō poo se long weekend foi e faamanatu ai lea aso tāua ona e faitau afe tagata e masani ona aofia ai.

Ua lagolagoina la e le faipule mai Paramatta o Andrew Charlton lea mana’oga o le komiuniti a Initia i Ausetalia ma ua faailoa foi le mataupu i luma o le Palemene.