Ua mananao le vaega faaupufai a le ACT ma le latou taitai o David Seymour e aveese visa faigaluega ae ia iai se fee poo se pili e totogi e pule o galuega pe afai latou te fia faafaigaluegaina tagata mai atunuu i fafo.

Fai mai Seymour e faigofie atu lea ma faigofie ai foi ona maua tagata e iai tomai e faafaigaluegaina i galuega. 

O se tasi lea o fuafuaga o faiga faavae a le vaega faaupufai i mataupu tau femalagaa’iga lea e faapea e faigofie ai ona aumai tagata talenia i Niu Sila e faigaluega ai e aunoa ma le tele o le mau feuiaiga.

Fai mai le ACT o le fee poo le totogi o loo latou faatuina mai e tutusa lava ma le pili o loo totogi mo le talosaga ai o le visa ma o le lelei foi o le faia o le faiga lea ona e mafai ai e le tagata e ana galuega ona silasila pe talafeagai le totogi o le tupe poo le fee lea e faafaigaluega ai tagata mai totonu lava o le atunuu nai lo le tau aumai mamao mai fafo o tagata faigaluega. 

Fai mai le vaega faaupufai o tulafono ma aiaiga o loo iai nei i le aumaia o tagata faigaluega ua fai lava si faigata ae tatau ona faia tulafono tau femalagaa’iga e faataga ai pule o galuega e aumai tagata ma tomai tonu o loo manaomia i galuega.